1Ti 5 | WSK | STEP | Ni kari garuk alo ining me nungaruko. Ni ka niet lage ningo kasursam iwitatala, ni ekeseng te lage ningo nunga kasuruko. Se kari kulak alo, mu ni ka launuria arungak betesam iwitatala aking arungak bitarko.

1 Timothy 5

Kris alo nunga bitua ko munan

1 Ni kari garuk alo ining me nungaruko. Ni ka niet lage ningo kasursam iwitatala, ni ekeseng te lage ningo nunga kasuruko. Se kari kulak alo, mu ni ka launuria arungak betesam iwitatala aking arungak bitarko. 2 Se imet garuk alo, mu ni ka niam ilak betesam iwitatala aking arungak bitarko. Se imet itiwik alo, mu ni ka keras ari arungak betesam iwitatala aking arungak bitarko, ale munan diram nunguningkiri mu te la arungak bitarko.

Imet nugari kuera wore nunga saonga ko den

3 Imet nugari kueman se am nongota nunguningkiri bagasan, mu ni Kris alo nunga manaru se nunga sangarmonko. 4 Bare nunga kuriang ago agi, nunumas ari ago agi mu, kuriang imas umutang mu nuna nunga sinar tamonko. Umutang mu nononga ura nunguningkiri. Mu awuk, nunga nunam nonet, se nunga nonongotak ari ulengkala nunga sangorman tala, se aking nuna ko koma kutuwu gilingisan. Se Kaem kilek sumu ko kueso.

5 Imet kuari kueram se am kota bagoso, mu nu ko ikia gomang biyala Kaem kote beteso, ale turom woremkalal sangukko aru manaruwoso. ^{▼▼1 Tim 5:5 Imet gerewa ilagala nunga duap dugu: Luke 2:37; Luke 18:7.} Se imet uwuta mu Kris alo nu sangarmonko. 6 Bare imet kuari kueram se nu ali imi ko amilmil mu la ko ikiso, mu nina arigisan marak bagoso iwita arigisan, bare nu mu kuera iwita bagoso. Se imet uwuta mu Kris alo nu me sangarmonko.

7 Ni den imi Kris alo ago nunga manaruko. Se nuna karo tumon ale memek bo mena am bagomonko. 8 Bare awiriya nu ko gue suwanta mu me nunga sinar taso, se aking awiriya nu ilak ko kawam te anisan mu me nunga sinar taso, umutang mu nu den nunguning buring tuam, ale nu kariimet nongomang ningi nunguning mena mu kilek memek te nunga kiaram.

9 Imet kuari kueram wore noko kilek iwita mu la ko nup bataguru se Kris alo sangarmonko: Mu nu ko yar 60 kiaram. Nu ko kuari ilak diram la bagaram. 10 Nu kilek yawara yawara te nup ago: nu ko kuriang yawarakala nunga bitarukaso, nu sor bo ko kariimet ko kawam te nunga sinar tokaso, nu Kris alo nunga ura saonga imet ko numi bitakaso, nu saki alo ikup ago mu nunga sangarukaso, ale ura gotektek saki yawarakala mu ago ninguru bitakaso. Mu ni imet uwutata mu la nunga nunup bataguruko.

11 Bare ni imet kulak nugari kueman mu nunga nunup me bataguruko.

Mu awuk, nuna kari iru tamonko nunga ikia nongomang barasuk, mu kilek umutang nunga tagirok se nuna Kristus nubiring tumonko. 12 Se mu te nuna nungumik den ago. Duap nuna giringila la Kristus ilak den nungurman wore aking kulukurman. ^{▼▼1 Tim 5:12 Imet imitang mu kari Kris mena mu nunga gikasan agila 1 Corinthians 7:39 arikko.} 13 Se betela, nunup bataguru mu nuna gagor ko kilek betemon ale kawam kawam geragomonko. Bare mu la mena. Nuna bo ko den tamon ale karogo kawam kawam geraga se balu balu geragomonko, mu nononga mel mena wore nuna balmonko. ^{▼▼1 Tim 5:13-14 Imet kulak nugari kueman mu Kris kari iru gimonko: 1 Cor 7:9; 39. Gagor ko kilek: 2 Thes 3:11.}

14 Se mu ko aninga ikia mu iwita, imet kulak nugari kueman mu kari iru am gimonko. Ale kuriang ilumon, ale nunga bitaru se, kawam ko ago la sinar tamonko. Uwutata betemon, mu bo nangarak beteso mu imet mu nungumik te den memek sang balmonko lage kuring bo me aringimonko. 15 Ni ikisam, imet kulak nugari kueman mu saki maingkala lage ningo beteman ale kari memek Satan kowom karowasan.

16 Kris imet bo, kota ko gue suwan ningi imet gerewa bo baguruk agi mu, nu kota imet gerewa mu sangukko. Umutang mu ikup mu Kris suen la nungumik te me namurukko. Se Kris alo imet saki nugari kueman se am nongota nunguningkiri bagasan mu la nunga sangarmonko.

Supuling alo nunga den saki

17 Supuling alo Kris alo nunga ningi ura yawarakala betesan, mu koma yawara la tamonko. Se nunga ningi kari den apusan, ale kariimet nunga balu kasursan se ikisan, mu koma ninguru tamonko. 18 Mu awuk, Kaem ko batoga te iwita balam:

“Tom bulmakau wheat nunguning gurugu patawu se geragawuruk, mu kuring me kaloko.”

Aking balam,

“Ura kari mu ko ura koma am taukko.” ^{▼▼1 Tim 5:17-18 Ura kari alo koma am tamonko: Deut 25:4; Mat 10:10; 1 Kor 9:9-11.}

19 Se kari suwanta nika manuk, “Supuling imi memek beteram,” mauk, mu ni noko den mu me ikiko. Kari ilagala agi ilagala suwan uwuta balmon mu asele ni nunga den ikiko. 20 Se nu nunguningta memek beteram agi mu, ni ilak Kris alo nomokete aratu ale ko memek ko ining tuiko. Se mu te saki alo memek betemonko mu nguangomonko.

21 Se ani Kaem, se Jesus Kristus, se engel kako alo nongoma te ani ka manorsam, den suen la balem imi ninguru karo tuiko. Bare bo kumik te munan bo kigilik me bitar, ale bo kumik te kilimik me bitarko, am suen la munan koma suwanta nungumik te bitarko.

22 Ni uririker ale kari bo Kris alo nunga supuling ko bagurukko me kiting patawur ale ko supuling te bitarko. Nu kari memek ago agi, wore ni ninguru me ko iki ale am ura kuting te bitar, mu ni kimik den nagurokko. Ni nimi ko sinar to ale diram la bagerko.

23 Ni pempem kuera tasam mu ko ni yu la me noko. Tom saki waen katirta karogo no se gemang tagu sangukko.

24 Kariimet saki nunga memek mu wetang te, se ana tairatela ko ikisan ale ko nunga manorsan. Bare kariimet saki nunga memek mu udagi te asele wetang te aratoso se ko ikisan. Koma suwanta tala, kilek ningo saki wetang te, se ana tairatela ko ikisan. Se saki wetang te mena, am tetela la betesan. Bare mu me yumurokkowo, wetang te tala aratuk se ko ikinakko.

25